Exodus 17:1 ουοϩ αςτωνς `νϫε ϯςυναγωγη τηρς `ντε νενϣηρι `μπιςραηλ εβολ ϧεν πϣαϥε `ντε ςινα κατα νουπαρεμβολη εβολ ϩιτεν `πςαϫι `μ`πϭοις ουοϩ αυϩικοτ ϧεν ραφαζιν ουοϩ νε μμον μωου δε μπιλαος εθρεϥςω.

Exodus 17:2 ουοϩ ναϥϩωουϣ `νϫε πιλαος ε μωυςης ουοϩ ναυϫω `μμος ϫε μα μωου ναν ϩινα ντενςω ουοϩ πεϫε μωυςης νωου ϫε εθβεου τετενϩωουϣ εροι ουοϩ εθβεου τετενϭωντ `μ`πϭοις.

Exodus 17:3 αϥιβι δε μμαυ `νϫε πιλαος ` νςα μωου ουοϩ αϥχρεμρεμ `νϫε πιλαος εϫεν μωυςης ευϫω `μμος ϫε εθβεου ακεντεν ε`πϣωι εβολ ϧεν χημι εϧοθβεν νεμ νενϣηρι νεμ νεντεβνωουι ντεν πιιβι

Exodus 17:4 αϥωϣ δε ε`πϣωι ϩα `πϭοις `νϫε μωυςης εϥϫω `μμος ϫε ου πεϯνααιϥ μπαιλαος ετι κεκουϫι ςεναϩιωνι εϫωι

Exodus 17:5 ουοϩ πεϫε `πϭοις μ μωυςης ϫε μοϣι ϧαϫωϥ μπιλαος ϭι νεμακ εβολ ϧεν νιϧελλοι `ντε πιλαος ουοϩ πιϣβωτ φη ετακμεϣ `φιομ `μμοϥ ϭιτϥ `ν`ϧρηι ϧεν τεκϫιϫ ουοϩ μοϣι ϧαϫωου ϣα ϯπετρα `ντε χωρηβ

Exodus 17:6 ανοκ δε ειεοϩι μμαυ ϧαϫωκ εϫεν ϯπετρα ϧεν χωρηβ ουοϩ εκεμεϣ ϯπετρα ϧεν πιϣβωτ ουοϩ εϥει εβολ `νϧητς `νϫε ουμωου ουοϩ εϥεςω `νϫε πιλαος ουοϩ αϥιρι `μπαιρηϯ `νϫε μωυςης`μπεμθο ννενϣηρι `μπιςραηλ

Exodus 17:7 ουοϩ αϥϯρεν φραν μπιμα ετεμμαυ ϫε πϭωντ νεμ `πϩωουϣ ννενϣηρι `μπιςραηλ ουοϩ ϫε αυϭεντ `πϭοις ευϫω `μμος ϫε αν `πϭοις ϣοπ νϧητεν ϣαν μμον.

Exodus 17:8 αϥι δε `νϫε πιαμαληκ ουοϩ ναϥβοτς ουβε πιςραηλ ϧεν ραφαζιν

Exodus 17:9 πεϫε μωυςης δε νιηςου ϫε ςωτπ νακ `νϩανρωμι ουοϩ μαϣενακ ϯ νεμ πιαμαληκ νραςϯ ουοϩ ανοκ ϩηππε ϯναοϩι ερατ ϩιϫεν ταφε μπιτωου ουοϩ πιϣβωτ `ντε `φνουϯ εϥχη ϧεν ταϫιϫ

Exodus 17:10 ουοϩ αϥιρι `νϫε ιηςου κατα φρηϯ εταϥϫος ναϥ `νϫε μωυςης ουοϩ αϥϣεναϥ εβολ αϥϯ νεμ πιαμαληκ ουοϩ μωυςης νεμ ααρων νεμ ωρ αυϣενωου ε`πϣωι εϫεν ταφε μπιτωου

Exodus 17:11 ουοϩ αςϣωπι αρεϣαν μωυςης ϥαι `ννεϥϫιϫ ε`πϣωι ϣαϥϫεμνομϯ `νϫε πιςραηλ εϣωπ δε αϥϣανχω `ννεϥϫιϫ ε`ϧρηι ϣαϥϫεμνομϯ `νϫε πιαμαληκ

Exodus 17:12 νενϫιϫ δε μ μωυςης νε αυϩροϣ πε ουοϩ αυϭι νουωνι αυχαϥ ϧαροϥ ουοϩ αϥϩεμςι ϩιϫωϥ ουοϩ ααρων νεμ ωρ αυταϫρο `ννεϥϫιϫ ουαι ςαμναι νεμ ουαι ςα`μναι ουοϩ αυϣωπι `νϫε νενϫιϫ μ μωυςης ευταϫρηουτ ϣατε φρη ϩωτπ

Exodus 17:13 ουοϩ α ιηςου ϧωτεβ μπιαμαληκ νεμ πεϥμηϣ τηρϥ ϧεν ουϧωτεβ ντςηϥι

Exodus 17:14 ουοϩ πεϫε `πϭοις μ μωυςης ϫε `ςϧε φαι ϩι ουϫωμ ε`φμευι εροϥ ουοϩ μηιϥ ε`ϧρηι ενενϫιϫ νιηςου ϫε ϧεν ουϥωϯ ϯναϥωϯ `μ`φμευι μπιαμαληκ εβολ ςαπεςητ ντφε

Exodus 17:15 ουοϩ αϥκωτ `νϫε μωυςης νουμανερϣωουϣι ουοϩ αϥϯρεν πεϥραν ϫε `πϭοις πε παμανφωτ

Exodus 17:16 ϫε ϧεν ουϫιϫ εςϩηπ `πϭοις ναϯ ουβε πιαμαληκ ιςϫεν ϫωου ϣα ϫωου