Exodus 25:1 ουοϩ α `πϭοις ςαϫι νεμ μωυςης εϥϫω `μμος

Exodus 25:2 ϫε αϫος ννενϣηρι `μπιςραηλ ουοϩ μαρουϭι νηι `νϩαναπαρχη εβολ ντοτου νουον νιβεν ετεςναι εϫεν πουϩητ ερετενεϭι `νϩαναπαρχη

Exodus 25:3 ουοϩ θαι τε ϯαπαρχη ετετενναϭιτς `ντοτου ουνουβ νεμ ουϩατ νεμ ουϩομτ

Exodus 25:4 νεμ ουϩυακινθινον νεμ ουϭηϫι νεμ ουκοκκος εϥκηβ νεμ ουϣενς εϥςαϯ νεμ ϩανϥωι μβαεμπι

Exodus 25:5 νεμ ϩανϣαρ νωιλι ευθρεϣρωϣ νεμ ϩανϣαρ νϩυακινθινον νεμ ϩανϣε `νατερϩολι

Exodus 25:6 ου νεϩ εθβε `πουωινι νεμ βαλςαμον εθβε ουνεϩ `νθωϩς νεμ `ςθοινουϥι `ναρωμα.

Exodus 25:7 νεμ ϩανωνι νςαρδινον νεμ ϩανωνι επιφωτϩ εϯεπωμις νεμ πιποτηρ

Exodus 25:8 ουοϩ εκεθαμιο νηι νουμαντουβο ουοϩ ειεουονϩτ ϧεν θηνου

Exodus 25:9 ουοϩ εκεθαμιο νηι κατα ϩωβ νιβεν εϯναταμοκ ερωου ϩιϫεν πιτωου πιςμοτ `ντε ϯςκυνη νεμ πιςμοτ `ντε νεςςκευος τηρου παιρηϯ εκεθαμιο

Exodus 25:10 ουοϩ εκεθαμιο νουκιβωτος `ντε ουμετμεθρε εβολ ϧεν ϩανϣε νατερϩολι εςιρι μμαϩι 2. ουϫος νϣιη ουοϩ ουμαϩι ουϫος επιουοςθεν ουοϩ ουμαϩι ουϫος επιϭιςι

Exodus 25:11 ουοϩ εκεοϣϫς ννουβ ϧεν ουνουβ εϥτουβηουτ ςαϧουν νεμ ςαβολ `μμος εκεοϥτς ννουβ ουοϩ εκεθαμιο νας `νϩανϩοτπ ννουβ ευφονϩ μπεςκωϯ

Exodus 25:12 ουοϩ εκεθαμιο νας ν4. `ν`ϣϭουρ `ννουβ νϫαϫϩ ουοϩ εκεχω ϩιϫεν πι4. `ν`κλιτος `ν`ϣϭουρ 2. ϩιϫεν πιουαι `νκλιτος ουοϩ ϣϭουρ 2. ϩιϫεν πικλιτος `μμαϩ 2.

Exodus 25:13 εκεθαμιο δε `νϩαναναφορον εβολ ϧεν ϩανϣε νατερϩολι ουοϩ εκεοϥτου ννουβ ϧεν ουνουβ

Exodus 25:14 ουοϩ εκεϩιουι ννιαναφορον εβολ ϧεν νιϣϭουρ νη ετχη ϧεν νικλιτος `ντε ϯκιβωτος εϥαι `νϯκιβωτος νϧητου

Exodus 25:15 `ν`ϧρηι ϧεν πιϣϭουρ `ντε ϯδιαθηκη ευεϣωπι `νϫε νιαναφορον ευοι νατκιμ

Exodus 25:16 ουοϩ εκεϩιουι εϧουν εϯκιβωτος `ννιμετμεθρευ νη εϯνατηιτου νακ.

Exodus 25:17 ουοϩ εκεθαμιο νουιλαςτηριον νεπιθεμα ννουβ εϥτουβηουτ μαϩι 2. ουϫος εϯϣιη ουοϩ ουμαϩι ουϫος επιοςθεν

Exodus 25:18 ουοϩ εκεθαμιο εχερουβιμ 2. `ννουβ μφωτϩ ουοϩ εκεχαυ ϩιϫεν πικλιτος 2. `ντε πιιλαςτηριον

Exodus 25:19 ευεϣωπι ευθαμιηουτ ουχερουβιμ εβολ ϧεν παικλιτος ουοϩ ουχερουβιμ εβολ ϧεν παικλιτος `μμαϩ2. `ντε πιιλαςτηριον ουοϩ εκεθαμιο μπιχερουβιμ 2. ϩιϫεν νικλιτος 2.

Exodus 25:20 ευεϣωπι `νϫε νιχερουβιμ ερε νουτενϩ φορϣ εβολ ςαπϣωι ευεερϧηιβι ϧεν νουτενϩ εϫεν πιιλαςτηριον ουοϩ ερε πουϩο ϫουϣτ εϧουν εϩρεν νουερηου ουοϩ ευεϣωπι ϩιϫεν πιιλαςτηριον `νϫε νιϩο `ντε νιχερουβιμ

Exodus 25:21 ουοϩ εκεχω μπιιλαςτηριον ςαπϣωι ϩιϫεν ϯκιβωτος ουοϩ εκεϩιουι εϧουν εϯκιβωτος ννιμετμεθρευ νη εϯνατηιτου νακ

Exodus 25:22 ουοϩ ειεουονϩτ εροκ μμαυ ουοϩ ειεςαϫι νεμακ ςαπϣωι `μπιιλαςτηριον ουτε πιχερουβιμ 2. νη ετχη ϩιϫεν ϯκιβωτος `ντε ϯμετμεθρε νεμ κατα ϩωβ νιβεν εϯναϩενϩωνκ ὲρωου ὲϫοτου ννενϣηρι `μπιςραηλ

Exodus 25:23 ουοϩ εκεθαμιο νουτραπεζα εβολ ϧεν ουνουβ εϥτουβηουτ μαϩι 2. εϯϣιη ουοϩ ουμαϩι εϯουηϣςι ουοϩ ουμαϩι ουϫος επιϭιςι

Exodus 25:24 ουοϩ εκεθαμιο νας νουϩοτπ `ννουβ `μμονμεν μπεςκωϯ ουοϩ εκεθαμιο νας νουχλομ εϥιρι νουϣοπ εϥκωϯ ερος

Exodus 25:25 ουοϩ εκεθαμιο νουϩοτπ `μμονμεν επιχλομ εϥκωϯ

Exodus 25:26 ουοϩ εκεθαμιο `ν4. `ν`ϣϭουρ `ννουβ ουοϩ εκεχω `μπι4. `νϣϭουρ εϫεν πι4. `μμερος `ντε νεςλακϩ ςαπεςητ μπιχλομ

Exodus 25:27 ουοϩ ευεϣωπι `νϫε νιϣϭουρ ευϩιουι εβολ νϧητου `ννιαναφορον ϩωςτε εϥαι νϯτραπεζα

Exodus 25:28 ουοϩ εκεθαμιο ννιαναφορον εβολ ϧεν ϩανϣε νατερϩολι ουοϩ εκεοϥτου ννουβ εϥτουβητου ευϥαι `νϯτραπεζα νϧητου

Exodus 25:29 ουοϩ εκεθαμιο ννεςβιναϫ νεμ νιϫη νεμ νιμοκι νουωτεν εβολ νεμ νιϣπλοκ νη ετουναουωτεν εβολ `νϧητου εκεθαμιωου εβολ ϧεν ουνουβ εϥτουβηουτ

Exodus 25:30 ουοϩ εκεχω ϩιϫεν ϯτραπεζα `νϩανωικ ναϩραι μπαμθο εβολ νςηου νιβεν

Exodus 25:31 ουοϩ εκεθαμιο νουλυχνια εβολ ϧεν ουνουβ νκαθαρος ϧεν ουνουβ μφωτϩ εκεθαμιο νϯλυχναι πεςκαυλος νεμ νικαλαμιςκος νεμ νικρατηρ νεμ νιςφερωτηρ ουοϩ νιϩρηρι ευεϣωπι εβολ `μμος

Exodus 25:32 6 δε νκαλαμιςκος ευνηου εβολ ϧεν νιςφιρωουι 3. `νκαλαμιςκος `ντε ϯλυχνια εβολ ϧεν πιουαι νκλιτος ντας ουοϩ 3. `νκαλαμιςκος `ντε ϯλυχνια εβολ ϧεν πικλιτος `μμαϩ 2.

Exodus 25:33 ουοϩ 3. `ν`κρατηρ ευοι μπιςμοτ `νϩανκαρια ϧεν πιουαι νκαλαμιςκος ουςφερωτηρ νεμ ουκρινον παιρηϯ μπιμαϩ6 `νκαλαμιςκος νη εθνηου εβολ ϧεν ϯλυχνια

Exodus 25:34 ουοϩ `ν`ϩρηι ϧεν ϯλυχνια 4. `νκρατηρ ευοι `μ`π`ςμοτ `νϩανκαριὰ νιςφερωτηρ νεμ νεςκρινον

Exodus 25:35 ουςφερωτηρ εϥεϣωπι ςαπεςητ `νκαλαμιςκος 2. εβολ `νϧητς ουοϩ ουςφερωτηρ εϥ ςαπεςητ νκαλαμιςκος 2. εβολ `νϧητς παιρηϯ ον μπι6 νκαλαμιςκος νη εθνηου εβολ ϧεν ϯλυχνια

Exodus 25:36 νιςφερωτηρ νεμ νικαλαμιςκος ευεϣωπι εβολ νϧητς εςφοτϩ τηρς εβολ ϧεν ουνουβ νουωτ εϥτουβηουτ

Exodus 25:37 ουοϩ εκεθαμιο ννεςϧηβς ευοι `νϣαϣϥ ουοϩ εκεςεμνι ννεςϧηβς ουοϩ ευεερουωινι εβολ ϧεν πιουαι νϩο

Exodus 25:38 ουοϩ πεςεπαριςτηρ νεμ νη εττωουν ϧαρος ευεϣωπι εβολ ϧεν ουνουβ `νκαθαρος

Exodus 25:39 εκεθαμιο ννεςςκευος τηρου νουϫινϭωρ `ννουβ εϥτουβηουτ

Exodus 25:40 αναυ εκεθαμιο νϩωβ νιβεν κατα πιτυπος εταυταμοϥ εροκ ϩιϫεν πιτωου