Exodus 8:1 πεϫε `πϭοις δε μ μωυςης ϫε μαϣενακ εϧουν ϩα φαραω ουοϩ εκεϫος ναϥ ϫε ναι νε νη ετεϥϫω `μμωου `νϫε `πϭοις ϫε ουωρπ μπαλαος εβολ ϩινα ντουϣεμϣι `μμοι.

Exodus 8:2 ιςϫε δε κουωϣ `νθοκ αν εουορπϥ εβολ ϩηππε ανοκ ειεϣαρι `ννεκϭιη τηρου ϧεν ϩανχρουρ.

Exodus 8:3 ουοϩ ερε `φιαρο βεβι ε`πϣωι ναϩνχρουρ ουοϩ αυϣανι ε`πϣωι ευεϣενωου εϧουν ενεκηου νεμ εϧουν ενιταμιον `ντε νεκκοιτων εϫεν νεκϭλοϫ νεν νενηου `ννεκαλωουι νεμ πεκλαος νεμ `ν`ϧρηι ϧεν νεκουωϣεμ νεμ `ν`ϧρηι ϧεν νεκθριρ.

Exodus 8:4 νεμ `ν`ϧρηι εϫωκ νεμ `ν`ϧρηι εϫεν πεκλαος νεμ εϫεν νεκαλωουι ευει ε`πϣωι `νϫε νιχρουρ.

Exodus 8:5 πεϫε `πϭοις δε μ μωυςης ϫε αϫος νααρων πεκςον ϫε ςουτεν πεκϣβωτ εβολ ετϧεν τεκϫιϫ εϫεν νιιαρωου νεμ εϫεν νιϣατς νεμ εϫεν νιϩελος ουοϩ ανιουι `ννιχρουρ επϣωι.

Exodus 8:6 ουοϩ αϥςουτεν τεϥϫιϫ εβολ `νϫε ααρων εϫεν νιμωου `ντε χημι ουοϩ αϥινι ε`πϣωι ννιχρουρ ουοϩ αϥϩωβς μπικαϩι `ντε χημι.

Exodus 8:7 αυιρι δε ϩωου `μπαιρηϯ `νϫε νιρεϥϭιϣημ `ντε νιρεμνχημι ϧεν ουμετφαρμακος ουοϩ αυινι ννιχρουρ εϫεν `πκαϩι `νχημι

Exodus 8:8 αϥμουϯ δε `νϫε φαραω ε μωυςης νεμ ααρων ουοϩ πεϫαϥ ϫε τωβϩ `μ`πϭοις εϩρηι εϫωι ουοϩ μαρεϥωλι μπιχρουρ εβολ ϩαροι νεμ εβολ ϩα παλαος ουοϩ ϯναουωρπ μπιλαος ϩινα ντουερϣουϣωουϣι `μ`πϭοις.

Exodus 8:9 πεϫε μωυςης δε φαραω ϫε ςεμνητς νεμηι ϫε ντατωβϩ εθβητκ νθναυ νεμ εθβε νεκαλωουι νεμ πεκλαος ετακο `ννιχρουρ εβολ ϩαροκ νεμ εβολ ϩα πεκλαος νεμ εβολ ϩα νετενηου εβηλ ενη εθναςωϫπ ϧεν φιαρο.

Exodus 8:10 νθοϥ δε πεϫαϥ ϫε ραςϯ πεϫαϥ ουν ϫε `μ`φρηϯ ετακϫος εςεϣωπι ϩινα ντεκεμι ϫε μμον κεουαι εβηλ ε`πϭοις.

Exodus 8:11 ουοϩ ευεωλι ννιχρουρ εβολ ϩαροκ νεμ εβολ ϩα νετενηου νεμ εβολ ϩα νεκαλωουι νεμ εβολ ϩα πεκλαος εβηλ ενη εθναςωϫπ ϧεν φιαρο.

Exodus 8:12 αϥι δε εβολ `νϫε μωυςης νεμ ααρων εβολ ϩα φαραω ουοϩ αϥωϣ ε`πϣωι ϩα `πϭοις `νϫε μωυςης εθβε ϯνει εταϥτηις ϧα νιχρουρ κατα φρηϯ εταϥςεμνητς νεμ φαραω.

Exodus 8:13 αϥιρι δε `νϫε `πϭοις κατα φρηϯ εταϥϫος `νϫε μωυςης ουοϩ αυμουνκ `νϫε νιχρουρ εβολ ϧεν νιηι νεμ εβολ ϧεν νιοϩι νεμ εβολ ϩα νικοι.

Exodus 8:14 ουοϩ αυθουωτου αυαιτου `νϭνωου `ϭνωου ουοϩ αϥχωνς `νϫε πικαϩι.

Exodus 8:15 εταϥναυ δε `νϫε φαραω ϫε α πιμτον ϣωπι αϥνϣοτ `νϫε πεϥϩητ ουοϩ `μπεϥςωτεμ νςωου κατα `φρηϯ εταϥςαϫι `νϫε `πϭοις.

Exodus 8:16 πεϫε `πϭοις δε μ μωυςης ϫε αϫος νααρων πεκςον ϫε ςουτεν πεκϣβωτ εβολ ϧεν τεκϫιϫ ουοϩ μα ουϣαϣ μπιουαν `ντε `πκαϩι ουοϩ ευεϣωπι `νϫε ϩανλελημ ϧεν νιρωμι νεμ ϧεν νιϥτεφατ νεμ ϧεν νιουαν τηρου `ντε `πκαϩι.

Exodus 8:17 ουοϩ α ααρων ςουτεν πεϥϣβωτ εβολ ϧεν τεϥϫιϫ αϥϯ νουϣαϣ ννιουαν `ντε `πκαϩι ουοϩ αυϣωπι `νϫε νιλελημ ϧεν νιρωμι νεμ ϧεν νιϥετφατ νεμ ϧεν νιουαν τηρου `ντε `πκαϩι ϧεν `πκαϩι τηρϥ `νχημι.

Exodus 8:18 αυιρι δε ϩωου `μπαιρηϯ `νϫε νιρεϥϭιϣημ ϧεν ουμετφαρμακος εθρουινι εβολ `ννιλελημ ουοϩ μπουϣϫεμϫομ ουοϩ αυϣωπι `νϫε νιλελημ ϧεν νιρωμι νεμ ϧεν νιϥτεφατ.

Exodus 8:19 πεϫε νιρεϥϭιϣημ ουν`μφαραω ϫε ουτηβ `ντε `φνουϯ πε φαι ουοϩ αϥνϣοτ `νϫε πϩητ`μφαραω ουοϩ `μπεϥςωτεμ νςωου κατα φρηϯ ετα `πϭοις ϫος.

Exodus 8:20 πεϫε `πϭοις δε μ μωυςης ϫε ϣορπκ `ντοουι ουοϩ οϩι ερατκ`μπεμθο`μφαραω ϩηππε νθοϥ ϥνηου εβολ εϫεν πιμωου ουοϩ εκεϫος ναϥ ϫε ναι νε νη ετεϥϫω `μμωου `νϫε `πϭοις ϫε ουωρπ μπαλαος εβολ ϩινα ντουϣεμϣι `μμοι `ν`ϩρηι ϩι `πϣαϥε.

Exodus 8:21 εϣωπ δε ακϣτεμουωϣ εουωρπ `μπαλαος εβολ ϩηππε ανοκ ϯναουωρπ εϩρηι εϫωκ νεμ εϫεν νεκαλωουι νεμ εϫεν πεκλαος νεμ εϫεν νεκηου νουαϥ νουϩορ ουοϩ ευεμοϩ `νϫε νενηου `ντε νιρεμνχημι εβολ ϧεν νιαϥ νουϩορ νεμ πικαϩι φη ετουχη ϩιϫωϥ.

Exodus 8:22 ουοϩ ειεϯωου ανοκ ϧεν πιεϩοου ετεμμαυ μπικαϩι `ντε γεςεμ φη ετε παλαος ϣοπ ϩιϫωϥ φαι `ννε αϥ νουϩορ ϣωπι `νϧητϥ ϩινα ντεκεμι ϫε ανοκ πε `πϭοις `φνουϯ `μπικαϩι τηρϥ.

Exodus 8:23 ουοϩ ειεϯ νουφωρϫ εβολ ουτε παλαος νεμ ουτε πεκλαος `ν`ϧρηι δε ϧεν ραςϯ εϥεϣωπι `νϫε παιμηινι ε`ϧρηι εϫεν `πκαϩι.

Exodus 8:24 αϥιρι δε `μπαιρηϯ `νϫε `πϭοις ουοϩ αϥι `νϫε πιαϥ νουϩορ εϥοϣ εϧουν ενενηου`μφαραω νεμ νενηου `ννεϥαλωουι νεμ εϫεν `πκαϩι τηρϥ `ντε χημι ουοϩ αϥϥωϯ εβολ `νϫε `πκαϩι εβολ ϧεν νιαϥ νουϩορ.

Exodus 8:25 αϥμουϯ δε `νϫε φαραω ε μωυςης νεμ ααρων εϥϫω `μμος ϫε μαϣενωτεν αριϣουϣωουϣι `μ`πϭοις πετεννουϯ `ν`ϩρηι ϩιϫεν πικαϩι.

Exodus 8:26 ουοϩ πεϫε μωυςης ϫε μμον `ϣϫομ `ντεςϣωπι `μπαιρηϯ νιβοϯ γαρ `ντε νιρεμνχημι πε τενναϣατου `μ`πϭοις πεννουϯ εϣωπ γαρ ανϣανϣατ νιβοϯ `ντε νιρεμνχημι μπουμθο ςεναϩιωνι εϫων.

Exodus 8:27 τενναϣεναν ουν ν3. `νὲϩοου `μμοϣι `ν`ϩρηι ϩι πϣαϥε ουοϩ `ντενϣετ ϣουϣωουϣι `μ``πϭοις πεννουϯ κατα φρηϯ εταϥϫος ναν.

Exodus 8:28 ουοϩ πεϫε φαραω ϫε ανοκ ϯναουορπ θηνου εβολ ϩινα `ντετενερϣουϣωουϣι `μ`πϭοις πετεννουϯ `νϩρηι ϩι πϣαϥε αλλα ννετενϣενωτεν ϩι φουει τωβϩ ουν εϫωι ϩα `πϭοις.

Exodus 8:29 πεϫε μωυςης δε ϫε ις ανοκ ϯναϣενηι εβολ ϩιτοτκ ουοϩ ειετωβϩ μ`φνουϯ ουοϩ εϥεϣεναϥ `νϫε πιαϥ νουϩορ εβολ ϩα φαραω νεμ εβολ ϩα νεϥαλωουι νεμ εβολ ϩα πεϥλαος `νραςϯ ουοϩ μπερουαϩτοτκ ϫε φαραω εερϩαλ εϣτεμουωρπ μπιλαος εβολ εερϣουϣωουϣι `μ`πϭοις

Exodus 8:30 αϥι δε εβολ `νϫε μωυςης ϩα φαραω ουοϩ αϥτωβϩ `μ`πϭοις

Exodus 8:31 αϥιρι δε `νϫε `πϭοις κατα φρηϯ εταϥϫος `νϫε μωυςης ουοϩ αϥωλι μπιαϥ νουϩορ εβολ ϩα φαραω νεμ εβολ ϩα νεϥαλωουι νεμ εβολ ϩα πεϥλαος ουοϩ `μπε ουαι μμαυατϥ ςωϫπ

Exodus 8:32 ουοϩ α φαραω θρε πεϥϩητ νϣοτ νεμ εϫεν παιςηου ον ουοϩ `μπεϥουωϣ εουωρπ `μπιλαος εβολ