Exodus 12:1 πεϫε `πϭοις δε μ μωυςης νεμ ααρων ϧεν `πκαϩι `νχημι εϥϫω `μμος.

Exodus 12:2 ϫε παιαβοτ φαι ταρχη `ντε νιεβητ `νωτεν πε φαι πιϩουιτ ναβοτ νωτεν πε ϧεν νιεβητ `ντε ϯρομπι.

Exodus 12:3 ςαϫι νεμ ϯςυναγωγη τηρς `ντε νενϣηρι τηρου `μπιςραηλ εκϫω `μμος ϫε `ν`ϧρηι ϧεν ςου μητ `μπιαβοτ μαρε πιουαι πιουαι ϭι ναϥ νουεςωου κατα νενηου `ννουιοϯ ουεςωου κατα ηι .

Exodus 12:4 εϣωπ δε ευςβοκ `νϫε νη ετϧεν πιηι ϩωςτε εϣτεμρωϣι επιεςωου εϥεϭι `μπεϥθεϣε νεμαϥ νεμ πεϥϣφηρ κατα νιηπι `μψυχη φουαι φουαι `μπεϥρωϣι εϥεϭιηπι `μμοϥ εουεςωου.

Exodus 12:5 ουεςωου νϩωουτ εϥϫηκ εβολ εαϥερουρομπι εϥεϣωπι νωτεν εβολ ϧεν νιϩιηβ νεμ εβολ ϧεν νιβαεμπι ερετενεϭι

Exodus 12:6 ουοϩ εϥεϣωπι ευαρεϩ εροϥ νωτεν ϣα ςου μητ 4. `μπιαβοτ ουοϩ ευεϣατϥ `νϫε πιμηϣ τηρϥ `ντε ϯςυναγωγη `ντε νενϣηρι `μπιςραηλ μφναυ `νρουϩι .

Exodus 12:7 ουοϩ ευεϭι εβολ ϧεν πιςνοϥ ουοϩ ευεχω ϩιϫεν ϯουεϫρο `ςνουϯ νεμ ϩιϫεν νιθουαι ϧεν νιηι ετουναουομου `νϧητου.

Exodus 12:8 ουοϩ ευεουωμ ννιαϥ `ν`ϩρηι ϧεν παιεϫωρϩ ευφοςι ϧεν ουχρωμ ουοϩ ϩανατϣεμηρ ϩι ϣανϣαϣι ευεουομου.

Exodus 12:9 ννετενουωμ εβολ νϧητου εϥουωτ ουδε εϥφοςι ϧεν ουμωου αλλα εϥϫεϥϫωϥ ϧεν ουχρωμ ϯαφε δε νεμ νιϭαλαυϫ νεμ νη ετςαϧουν.

Exodus 12:10 ννετενχω εβολ `μμοϥ εςωϫπ εϣωρπ ουοϩ ουκας `ννετενκαϣϥ εβολ `μμοϥ νη δε εθναςωϫπ εβολ `μμοϥ εϣωρπ ερετενεροκϩου ϧεν ουχρωμ.

Exodus 12:11 ερετενεουομου δε `μπαιρηϯ ευμηρ `νϫε νετενϯπι ουοϩ νετενθωουι ευϧεν νετενϭαλαυϫ ουοϩ νετενϣβοϯ ευϧεν νετενϫιϫ ουοϩ ερετενεουομϥ ϧεν ουιως ουπαςχα `μ`πϭοις πε.

Exodus 12:12 ουοϩ ειεςινι ϧεν `πκαϩι `νχημι ϧεν παιεϫωρϩ ουοϩ ειεϣαρι εϣαμιςι νιβεν ετε `ν`ϧρηι ϧεν `πκαϩι `νχημι ιςϫεν φρωμι ϣα `πτεβνη ουοϩ `ν`ϩρηι ϧεν νινουϯ τηρου `ντε νιρεμνχημι ειειρι `μπιϭιμπϣιϣ ανοκ `πϭοις.

Exodus 12:13 ουοϩ εϥεϣωπι νωτεν `νϫε πιςνοϥ ϧεν ουμηινι ϩιϫεν νιηι νη νθωτεν ετετενχη νϧητου ουοϩ ειεναυ επιςνοϥ ουοϩ ειεϩωβς εβολ εϫωτεν ουοϩ `ννε ερϧοτ ϣωπι ϧεν θηνου επϧομϧεμ ϩοταν αιϣανϣαρι ϧεν `πκαϩι `νχημι.

Exodus 12:14 ουοϩ εϥεϣωπι νωτεν `νϫε πιεϩοου νουερφμευι ουοϩ ερετενεαιϥ `μ`πϭοις ϣα νετενϫωου ουνομος νενεϩ ερετενεαιϥ νϣαι

Exodus 12:15 ϣαϣϥ `νὲϩοου ὲρετενεουεμ ατϣεμηρ ιςϫεν πιεϩοου νϩουιτ ερετενετακε ουϣεμηρ εβολ ϧεν νετενηου ουον νιβεν εθναουωμ ϣεμηρ ευεϥωϯ νϯψυχη ετεμμαυ εβολ ϧεν πιςραηλ ιςϫεν πιεϩοου νϩουιτ ϣα πιεϩοου `μμαϩ ϣαϣϥ .

Exodus 12:16 ουοϩ πιεϩοου νϩουιτ ευεμουϯ εροϥ ϫε ϥουαβ ουοϩ πιὲϩοου `μμαϩ ϣαϣϥ ευὲμουϯ εροϥ ϫε ϥουαβ νωτεν ϩωβ νιβεν `νϣεμϣι ννετεναιτου `ν`ϧρηι νϧητου εβηλ ενη τηρου εταυθαμιò `μμωου `μψυχη νιβεν φαι μμαυατϥ ευεθαμιοϥ νωτεν.

Exodus 12:17 ουοϩ ερετενεαρεϩ εταιεντολη `ν`ϧρηι ϧεν παιεϩοου ειεινι ντετενϫομ εβολ ϧεν `πκαϩι `νχημι ουοϩ ερετενειρι μπαιεϩοου ϣα νετενϫωου νουνομος νενεϩ

Exodus 12:18 ευναερϩητς νςου μητ 4. `μπιαβοτ `νϩουιτ ιςϫεν φναυ `νϩανὰρουϩι ερετενεουεμ ατϣεμηρ ϣα ςου ϫουτ ουαι `μπιαβοτ ϣατε ρουϩι ϣωπι.

Exodus 12:19 ϣαϣϥ `νεϩοου `ννουϫεμ ϣεμηρ ϧεν νετενηου ουον νιβεν εθναουωμ εουον ϣεμηρ `μμοϥ ευεϥωϯ νϯψυχη ετεμμαυ εβολ ϧεν ϯςυναγωγη `ντε νενϣηρι `μπιςραηλ ϧεν νιϣεμμωου νεμ νιρεμνϯμι `ντε πικαϩι.

Exodus 12:20 ννετενουωμ νϩωβ νιβεν εουον ϣεμηρ `μμοϥ ϧεν μανϣωπι νιβεν ντωτεν ερετενουωμ ατϣεμηρ

Exodus 12:21 αϥμουϯ δε `νϫε μωυςης ενιϧελλοι τηρου `ντε πιςραηλ ουοϩ πεϫαϥ νωου ϫε μαϣενωτεν ϭι νουεςωου κατα νετενςυγγενια ουοϩ ϣωτ μπιπαςχα `μ`πϭοις

Exodus 12:22 ερετενεϭι δε νουϣολ νϩυςωπος ουοϩ ερετενεςωπ εβολ ϧεν πιςνοϥ φη ετϧατεν πιρο ουοϩ ερετενελαλε νετενθουαι νεμ ϯουεϫρο ςνουϯ εβολ ϧεν πιςνοϥ ετϧατεν πιρο νθωτεν δε `ννετενι εβολ φουαι φουαι μφρο `ντε πεϥηι ϣα ϩανατοουι

Exodus 12:23 ουοϩ εϥεςινι `νϫε `πϭοις εϣαρι ενιρεμνχημι ουοϩ εϥεναυ επιςνοϥ ϩιϫεν πιθουαι νεμ ϩιϫεν ϯουεϫρο `ςνουϯ ουοϩ ερε ``πϭοις ςεν πιρο ουοϩ `ννεϥχα πιρεϥτακο ει εϧουν ενετενηου εϣαρι ερωτεν.

Exodus 12:24 ουοϩ ερετενεαρεϩ επαιςαϫι νουνομος νενεϩ νακ νεμ νεκϣηρι ϣα ενεϩ.

Exodus 12:25 εϣωπ δε αρετενϣανϣενωτεν εϧουν επικαϩι φη ετε `πϭοις νατηιϥ νωτεν `μ`φρηϯ εταϥςαϫι ερετενεαρεϩ επαιϣεμϣι.

Exodus 12:26 ουοϩ εςεϣωπι αυϣανϫος νωτεν `νϫε νετενϣηρι ϫε παιϣεμϣι ου πε.

Exodus 12:27 ουοϩ ερετενεϫος ϫε ουϣουϣωουϣι `μ`πϭοις πε παιπαςχα `μ`φρηϯ εταϥτουϫο ννενηου ννενϣηρι `μπιςραηλ ϧεν χημι ϩοτε εταϥϣαρι ενιρεμνχημι νενηου δε ανον αϥναϩμου ουοϩ αϥϩιτϥ επεςητ `νϫε πιλαος αϥουωϣτ.

Exodus 12:28 ουοϩ αυϣενωου `νϫε νενϣηρι `μπιςραηλ αυιρι κατα `φρηϯ ετα `πϭοις ϩονϩεν ετοτϥ μ μωυςης νεμ ααρων αυιρι `μπαιρηϯ.

Exodus 12:29 αςϣωπι δε ετα τφαϣι μπιεϫωρϩ ϣωπι α `πϭοις ϣαρι εϣαμιςι νιβεν ετϧεν χημι ιςϫεν πϣορπ `μμιςι`μφαραω φη ετϩεμςι ϩιϫεν πθρονος ϣα πϣορπ μμιςι `νϯεχμαλωτος θη ετχη ϧεν πιλακκος νεμ πϣορπ μμιςι ντεβνη νιβεν.

Exodus 12:30 ουοϩ αϥτωνϥ `νϫε φαραω νϫωρϩ νεμ νεϥαλωουι τηρου νεμ νιρεμνχημι τηρου ουοϩ α ουνιϣϯ `νϧρωου ϣωπι ϧεν `πκαϩι τηρϥ `ντε χημι νε μμον ηι γαρ πε μπε ουον μου `νϧητϥ.

Exodus 12:31 ουοϩ αϥμουϯ `νϫε φαραω ε μωυςης νεμ ααρων νϫωρϩ ουοϩ πεϫαϥ νωου ϫε τεν θηνου μαϣενωτεν εβολ ϧεν παλαος νθωτεν νεμ νενϣηρι `μπιςραηλ μαϣενωτεν ϣεμϣι `μ`πϭοις πετεννουϯ `μ`φρηϯ ετετενϫω `μμος.

Exodus 12:32 ουοϩ νετενεςωου νεμ νετενεϩωου ϭιτου μαϣενωτεν κατα φρηϯ ετερετενϫος ςμου δε εροι ϩω

Exodus 12:33 ουοϩ ναρε νιρεμνχημι ϭι μπιλαος `νϫονς ϧεν ουιως εϩιτου εβολ ϧεν πικαϩι αυϫος γαρ ϫε ανον τηρεν τενναμου

Exodus 12:34 αϥϭι δε `νϫε πιλαος μπινιϣϯ `μπατουϭιϣεμηρ `νϫε νουουωϣεμ ευμηρ ϧεν νουϩβως ϩι τουναϩβι.

Exodus 12:35 νενϣηρι δε `μπιςραηλ αυιρι κατα `φρηϯ ετα μωυςης ουαϩςαϩνι νωου ουοϩ αυερετιν ντοτου `ννιρεμνχημι `νϩανςκευος ννουβ νεμ ϩανςκευος `νϩατ νεμ ϩανϭιϩβως.

Exodus 12:36 ουοϩ α `πϭοις ϯ νουϩμοτ `μπεϥλαος`μπεμθο ννιρεμνχημι ουοϩ αυϯ νωου ουοϩ αυϣελ νιρεμνχημι

Exodus 12:37 αυουωτεβ δε `νϫε νενϣηρι `μπιςραηλ εβολ ϧεν ραμαςςη εςοκχωθ ευμεϩ ςοου ϣε `νϣο νρεμνρατου ςαβολ μπουςοβϯ.

Exodus 12:38 ουοϩ ουνιϣϯ μμηϣ εϥμοϫτ αυϣε ε`πϣωι νεμωου νεμ ϩανεςωου νεμ ϩανεϩωου νεμ ϩαντεβνωουι ευοϣ εμαϣω ευςωκ εβολ νεμωου

Exodus 12:39 ουοϩ αυϫωϫ μπιϣωϯ φη εταυενϥ `νχημι `νϩανκενεφιτεν νατϣεμηρ νε `μπεϥϭιϣεμηρ γαρ πε αυϩιτου εβολ `νϫε νιρεμνχημι ϧεν ουιως ουοϩ μπουϣϫεμϫομ `νοϩι ουδε `μπουθαμιε ϧρε νωου ϩι `φμωιτ

Exodus 12:40 πιϫινϫωιλι δε `ντε νενϣηρι `μπιςραηλ εταυερρεμνϫωιλι `μμοϥ ϧεν `πκαϩι `νχημι νεμ ϧεν `πκαϩι νχανααν νθωου νεμ νουιοϯ 4. ϣε μαπ `νρομπι νε.

Exodus 12:41 ουοϩ αςϣωπι μενενςα ϯ4. ϣε μαπ `νρομπι αςι `νϫε ϯϫομ τηρς `ντε `πϭοις εβολ ϧεν `πκαϩι `νχημι νϫωρϩ.

Exodus 12:42 ουουερϣι `ντε `πϭοις τε ϩωςτε εενου εβολ ϧεν `πκαϩι `νχημι μπιεϫωρϩ ετεμμαυ θαι ουουερϣι `ντε `πϭοις τε ϩωςτε `ντεςϣωπι ννενϣηρι τηρου `μπιςραηλ ϣα νουϫωου

Exodus 12:43 πεϫε `πϭοις δε μ μωυςης νεμ ααρων ϫε φαι πε φνομος `μπιπαςχη αλλογενης νιβεν `ννεϥουωμ εβολ `μμοϥ.

Exodus 12:44 ουοϩ βωκ νιβεν `ντε ουαι νεμ ϣωπ ϧα ϩατ εκεςουβητϥ τοτε εϥεουωμ εβολ `μμοϥ

Exodus 12:45 ουρεμνϫωιλι νεμ ουρεμβεχε `ννεϥουωμ εβολ `μμοϥ.

Exodus 12:46 ϧεν ουηι νουωτ ερετενεουομϥ `ννετενςωϫπ εβολ ϧεν νιαϥ εϩανατοουι ννετενινι εβολ ϧεν νιαϥιουι εβολ ϧεν νιηι ουοϩ ουκας ννετενκαϣϥ εβολ `μμοϥ.

Exodus 12:47 ϯςυναγωγη τηρς `ντε νενϣηρι `μπιςραηλ ευεερ φαι.

Exodus 12:48 εϣωπ δε αϥϣανι ϩαρωτεν `νϫε ουϣεμμο ουοϩ ντεϥιρι `μπιπαςχα `μ`πϭοις εκεςουβε ϩωουτ νιβεν `νταϥ ουοϩ τοτε εϥει εϧουν εαιϥ ουοϩ εϥεϣωπι `μ`φρηϯ `μπιρεμνϯμι `ντε `πκαϩι ατςεβι νιβεν `ννεϥουωμ εβολ `μμοϥ.

Exodus 12:49 ουνομος νουωτ εϥεϣωπι μπιρεμνϯμι νεμ πιϣεμμο εθναι εϧουν ϧεν θηνου.

Exodus 12:50 ουοϩ αυιρι `νϫε νενϣηρι `μπιςραηλκατα φρηϯ ετα `πϭοις ϩονϩεν ετοτϥ μ μωυςης νεμ ααρων αυιρι `μπαιρηϯ

Exodus 12:51 ουοϩ αςϣωπι ϧεν πιεϩοου ετεμμαυ α `πϭοις εν νενϣηρι `μπιςραηλ εβολ ϧεν `πκαϩι `νχημι νεμ τουϫομ