Exodus 34:1 ουοϩ πεϫε `πϭοις ϫε μαθαμιο νακ `νκεπλαξ ςνουϯ νωνι `μ`φρηϯ ννιϩουαϯ ουοϩ αμου ε`πϣωι ϩαροι επιτωου ουοϩ `νταςϧαι ϩι νιπλαξ ννιςαϫι νη εναυχη ϩι νιπλαξ νϩουαϯ νη ετακϧεμεωμου.

Exodus 34:2 ουοϩ ϣωπι εκεςεβτωτ νϣωρπ ουοϩ εκει εϫεν πιτωου `ντε ςινα ουοϩ εκεοϩι ερατκ νηι μμαυ ϩιϫεν πλακϩ `ντε πιτωου.

Exodus 34:3 ουοϩ μπενθρε `ϩλι ι ε`πϣωι νεμακ ουδε μπενθρε `ϩλι ουωνϩ ϩιϫεν πιτωου επτηρϥ ουοϩ νιεςωου νεμ νιεϩωου `μπενθρουμονι ϧατεν πιτωου ετεμμαυ.

Exodus 34:4 ουοϩ αϥθαμιο νϯπλαξ ςνουϯ νωνι κατα φρηϯ ννιϩουαϯ ουοϩ αϥϣορπϥ ντοουι `νϫε μωυςης αϥι ε`πϣωι εϫεν πιτωου `ντε ςινα κατα φρηϯ ετα `πϭοις ϩονϩεν ναϥ ουοϩ αϥωλι νεμαϥ `νϫε μωυςης νϯπλαξ ςνουϯ νωνι.

Exodus 34:5 ουοϩ αϥι επεςητ `νϫε `πϭοις ϧεν ουϭηπι ουοϩ αϥοϩι ερατϥ `μμαυ ουοϩ αϥμουϯ `νϫε μωυςης εφραν `μ`πϭοις.

Exodus 34:6 ουοϩ αϥςινι `νϫε `πϭοις `μπεϥμθο ουοϩ αϥμουϯ `νϫε μωυςης ϫε `πϭοις `πϭοις `φνουϯ `ντε νιμετϣενϩητ νεμ νιμεθναητ πιρεϥωου νϩητ φα πινιϣϯ νναι ουοϩ πιαληθινος.

Exodus 34:7 ουοϩ εϥαρεϩ εουμεθμηι ουοϩ εϥιρι νουναι ϣα ϩανϣο εϥωλι ννιανομια νεμ νιαδικια νεμ νινοβι ουοϩ `ννεϥτουβο μφη ετοι νενοχος εϥινι ννινοβι `ντε νιιοϯ εϫεν νιϣηρι νεμ εϫεν νιϣηρι `ντε νιϣηρι ϣα ϯμαϩ ϣομϯ νεμ ϯμαϩ `ϥτοε νγενεα.

Exodus 34:8 ουοϩ αϥιης `νϫε μωυςης αϥϩιτϥ ϩιϫεν πικαϩι αϥουωϣτ.

Exodus 34:9 ουοϩ πεϫαϥ ϫε ιςϫε αιϫιμι νουϩμοτ `μπεκμθο μαρε παϭοις μοϣι νεμαν πιλαος γαρ ουναϣτναϩβι πε ουοϩ εκεωλι `νθοκ ννενανομια νεμ νεννοβι ουοϩ εκεϣωπι νεμακ.

Exodus 34:10 ουοϩ πεϫε `πϭοις μ μωυςης ϫε ϩηππε ανοκ ειεςεμνι νεμακ νουδιαθηκη`μπεμθο μπεκλαος τηρϥ ουοϩ ειερι `νϩανμεθνιϣϯ νεμ ϩανωου ναι ετε `μπουϣωπι ϩιϫεν πικαϩι τηρϥ νεμ ϧεν εθνος νιβεν ουοϩ εϥεναυ `νϫε πιλαος τηρϥ νη `νθοκ ετεκ νϧητου ενιϩβηουι `ντε `πϭοις ϫε ϩανϣφηρι νε νη εϯνααιτου νακ.

Exodus 34:11 μαϩθηκ `νθοκ ϧεν ϩωβ νιβεν εϯναϩενϩωνκ ερωου ϩηππε ανοκ ειεϩιουι εβολ ϧαϫωτεν μπιαμορρεος νεμ πιχαμαμεος νεμ πιχεττεος νεμ πιφερεςεος νεμ πιευεος νεμ πιγεργεςεος νεμ πιεβουςεος.

Exodus 34:12 μαϩθηκ εροκ μηπως ντεκχω νουδιαθηκη νεμ νη ετϩεμςι ϩιϫεν πικαϩι ετεκναϣενακ εϧουν εροϥ μηπως `ντε ουϭροπ ϣωπι ϧεν θηνου.

Exodus 34:13 νουϣηουι ερετενεουοϫπου ουοϩ νουςτυλη ερετενεϧεμϧωμου ουοϩ νουϣϣην ναλςος ερετενεκορϫου ουοϩ νιφωτϩ `ντε νουνουϯ ερετενεροκϩου ϧεν πι`χρωμ.

Exodus 34:14 ουδε γαρ ννετενουωϣτ νκενουϯ `μ`πϭοις γαρ `φνουϯ ουραν νρεϥχοϩ πε ουνουϯ νρεϥχοϩ πε.

Exodus 34:15 μηποτε ντεκςεμνι νουδιαθηκη νεμ νη ετϩεμςι ϩιϫεν πικαϩι ουοϩ ντετενερπορνευιν ςαφαϩου `ννουνουϯ ουοϩ `ντουϣετϣουϣωουϣι ννουνουϯ ουοϩ `ντουμουϯ εροκ ουοϩ `ντεκουωμ εβολ ϧεν `νουϣουϣωουϣι.

Exodus 34:16 ουοϩ ντεκϭι εβολ ϧεν νουϣερι `ννεκϣηρι ουοϩ ντεκϯ `ννουϣηρι εβολ ϧεν νεκϣερι ουοϩ `ντουερπορνευιν `νϫε νεκϣερι ςαφαϩου ννουνουϯ ουοϩ ευεθρε νεκϣηρι ερπορνευιν ςαφαϩου `ννουνουϯ.

Exodus 34:17 ουοϩ `ννεκθαμιο νακ `νϩαννουϯ `μφωτϩ.

Exodus 34:18 ουοϩ πϣαι `ντε νιατϣεμηρ εκαρεϩ εροϥ ϣαϣϥ νεϩοου εκεουεμ ατϣεμηρ `μ`φρηϯ εταιϩονϩεν νακ ϧεν πςηου `ντε πιαβοτ `ντε νιβερι `ν`ϩρηι γαρ ϧεν πιαβοτ `ντε νιβερι ακι εβολ ϧεν `πκαϩι `νχημι.

Exodus 34:19 ϩωβ νιβεν εθναουων ετοϯ νιϩωουτ ευεϣωπι νηι ουϣαμιςι `ντε ουμαςι νεμ ουϣαμιςι `ντε ουεςωου.

Exodus 34:20 ουοϩ ουϣαμιςι νιω εκεςοτϥ ϧα ουεςωου εϣωπ δε ακϣτεμςοτϥ εκεϯ ντεϥτιμη ϣορπ `μμιςι νιβεν `ντε νεκϣηρι εκεςοτου `ννεκουονϩκ μπαμθο εβολ εκϣουιτ.

Exodus 34:21 6 νεϩοου πε ετεκεερϩωβ `μμωου ϧεν πιεϩοου δε μμαϩ ϣαϣϥ εκεμτον `μμοκ ϧεν πςιϯ νεμ πιωςϧ εκεεμτον `μμοκ.

Exodus 34:22 ουοϩ πιϣαι `ντε νιανανϣαϣϥ εκεαιϥ νηι `ταρχη `ντε πιωςϧ ςουο ουοϩ πιϣαι `ντε πιθωουϯ εϧουν ϧεν θμηϯ `νϯρομπι.

Exodus 34:23 3. `νςηου νϯρομπι ευεουονϩου `νϫε ϩωουτ νιβεν ντακ `μπεμθο `μ`πϭοις `φνουϯ `ντε πιςραηλ.

Exodus 34:24 εϣωπ γαρ αιϣανϩιουι ννιεθνος εβολ ϧαϫωκ ουοϩ νταθρε νεκϭιηου ουοςθεν `ννε `ϩλι `ντε πεκκαϩι ερεπιθυμιν ϧεν πεκϫινι ε`πϣωι εουονϩκ`μπεμθο `μ`πϭοις πεκνουϯ 3. `νςηου νϯρομπι.

Exodus 34:25 `ννεκϣωτ εϩρηι εϫεν ουϣεμηρ `νου`ςνοϥ `ντε ϩανϣουϣωουϣι ντηι ουοϩ `ννεϥνκοτ ετοουι `νϫε ουϣωτ `ντε `πϣαι `μπιπαςχα.

Exodus 34:26 νιϩουαϯ `ντε νιουταϩ `ντε πεκκαϩι εκεενου εϧουν επηι `μ`πϭοις πεκνουϯ `ννεκφες ουϩιηβ ϧεν τερωϯ `ντε τεϥμαυ.

Exodus 34:27 ουοϩ πεϫε `πϭοις μ μωυςης ϫε ςϧαι νακ `ννιςαϫι ε`ϧρηι γαρ εϫεν ναιςαϫι αιςεμνι νουδιαθηκη νεμακ νεμ πιςραηλ.

Exodus 34:28 ουοϩ ναϥχη μμαυ πε `νϫε μωυςης `ϩμε νεϩοου νεμ `ϩμε `νεϫωρϩ `μπεμθο `μ`πϭοις ωικ `μπεϥουωμ ουοϩ μωου `μπεϥςο ουοϩ αϥςϧαι ϩι νιπλαξ `ντε ϯδιαθηκη πιμητ νςαϫι.

Exodus 34:29 ϩως δε εϥνηου επεςητ `νϫε μωυςης εβολ ϧεν πιτωου `νςινα ουοϩ ϩηππε ναρε ϯπλαξ ςνουϯ ϧεν νενϫιϫ `μ μωυςης εϥνηου δε επεςητ εβολ ϩι πιτωου ουοϩ ναϥεμι αν πε `νϫε μωυςης ϫε αϥϭιωου `νϫε πϩο μπανομ `ντε πεϥϩο ϧεν `πϫινθρε `φνουϯ ςαϫι νεμαϥ.

Exodus 34:30 ουοϩ αϥναυ `νϫε ααρων νεμ νενϣηρι τηρου `μπιςραηλ ε μωυςης ουοϩ ναϥμεϩ νωου πε `νϫε πϩο `ντε πανομ `ντε πεϥϩο ουοϩ ναυερϩοϯ εϧωντ εροϥ πε.

Exodus 34:31 ουοϩ αϥμουϯ ερωου `νϫε μωυςης ουοϩ αϥταςθο ϩαροϥ `νϫε ααρων νεμ νιαρχων τηρου `ντε ϯςυναγωγη ουοϩ αϥςαϫι νεμωου `νϫε μωυςης.

Exodus 34:32 ουοϩ μενενςα ναι αυι ϩαροϥ τηρου `νϫε νενϣηρι `μπιςραηλ ουοϩ αϥϩονϩεν νωου νϩωβ νιβεν ετα `πϭοις ςαϫι `μμωου νεμαϥ ϩιϫεν πτωου `ντε ςινα.

Exodus 34:33 ουοϩ μενενςα εταϥουω εϥςαϫι νεμωου αϥϯ νουκαλυμμα εϫεν πεϥϩο.

Exodus 34:34 εϣωπ δε αϥϣανι εϧουν `νϫε μωυςης `μπεμθο `μ`πϭοις εςαϫι νεμαϥ ϣαϥωλι μπικαλυμμα μμαυ ϣατεϥνουι νι εβολ ουοϩ αϥϣανι εβολ ϣαϥςαϫι νεμ νενϣηρι τηρου `μπιςραηλ `νϩωβ νιβεν ετα `πϭοις ϩενϩωνϥ ερωου.

Exodus 34:35 ουοϩ αυναυ `νϫε νενϣηρι `μπιςραηλ επϩο μ μωυςης ϫε αϥϭιωου ουοϩ αϥϯ `νϫε μωυςης `μπικαλυμμα εϫεν πεϥϩο ϣα πιναυ ετεϥναϣε εςαϫι νεμ `πϭοις