Exodus 14:1 ουοϩ α `πϭοις ςαϫι νεμ μωυςης εϥϫω `μμος.

Exodus 14:2 ϫε ςαϫι νεμ νενϣηρι `μπιςραηλ ουοϩ μαρουουωτεβ `νςεθωουϯ`μπεμθο νϯερβι ουτε μεϣτωλ νεμ ουτε `φιομ`μπεμθο `μβελςεφων εκεθωουϯ μπουμθο ϩιϫεν `φιομ.

Exodus 14:3 ουοϩ εϥεϫος `νϫε φαραω `μπεϥλαος εθβε νενϣηρι `μπιςραηλ ϫε ςεςορεμ `νϫε ναι ϧεν `πκαϩι αϥμαϣθαμ γαρ εϩραυ `νϫε `πϣαϥε.

Exodus 14:4 ανοκ δε ειεθρε πϩητ`μφαραω νϣοτ ουοϩ εϥεϭοϫι ςαφαϩου `μμωου ουοϩ ειεϭιωου `ν`ϧρηι ϧεν φαραω νεμ `ν`ϧρηι ϧεν νεϥματοι τηρου ουοϩ ευεεμι `νϫε νιρεμνχημι τηρου ϫε ανοκ πε `πϭοις ουοϩ αυιρι `μπαιρηϯ.

Exodus 14:5 ουοϩ αυϭι μπιϣινι μπουϩο `ντε νιρεμνχημι ϫε αϥφωτ `νϫε πιλαος ουοϩ αϥφωνϩ `νϫε `πϩητ `μφαραω νεμ νεϥαλωουι εϫεν πιμηϣ ουοϩ πεϫωου ϫε ου πε φαι εταναιϥ ετανουωρπ `ννενϣηρι `μπιςραηλ εβολ εϣτεμθρουερβωκ ναν

Exodus 14:6 αϥνοϩεβ ουν `νϫε φαραω `ννεϥβερεϭωουτς ουοϩ πεϥμηϣ τηρϥ αϥολϥ νεμαϥ

Exodus 14:7 ουοϩ αϥϭι `νςοου ϣε `μβερεϭωουτς ευςοτπ νεμ νι`ϩθωρ τηρου `ντε νιρεμνχημι νεμ ϩαντριςτατης ευχη ε`ϧρηι εϫωου τηρου.

Exodus 14:8 ουοϩ α `πϭοις θρε πϩητ`μφαραω `νϣοτ πουρο `ντε νιρεμνχημι νεμ νεϥαλωουι ουοϩ αυϭοϫι ςαφαϩου ννενϣηρι δε `μπιςραηλ ναυμοϣι εβολ πε ϧεν ουϫιϫ εςϭοςι.

Exodus 14:9 ουοϩ αυϭοϫι `νϫε νιρεμνχημι ςαφαϩου `μμωου ουοϩ αυϫεμου εςκεν `φιομ ουοϩ νιϩθωρ τηρου νεμ νιϩαρμα `ντε φαραω νεμ νεϥματοι νεμ νεϥϭαςιϩθο αυθωουϯ`μπεμθο νϯερβι θη ετε`μπεμθο `μβελςεφων.

Exodus 14:10 ουοϩ ναϥ ϧαϫωου πε `νϫε φαραω ουοϩ αυϫουϣτ `ννουβαλ `νϫε νενϣηρι `μπιςραηλ αυναυ ουοϩ ις νιρεμνχημι αυθωουϯ ϩιφαϩου `μμωου ουοϩ αυερϩοϯ εμαϣω αυωϣ δε ε`πϣωι ϩα `πϭοις `νϫε νενϣηρι `μπιςραηλ.

Exodus 14:11 ουοϩ πεϫωου μ μωυςης ϫε αν ετε `μμον μϩαυ ϧεν `πκαϩι `νχημι ακεντεν εβολ εϧοθβεν ϩι `πϣαϥε ου πε φαι ετακαιϥ ναν εακεντεν εβολ ϧεν `πκαϩι `νχημι

Exodus 14:12 αν φαι αν πε πιςαϫι ετανϫοϥ νακ ϧεν χημι ενϫω `μμος ϫε χαν μαρενερβωκ ννιρεμνχημι νανες γαρ ντενερβωκ `ννιρεμνχημι εϩοτε ντενμου `ν`ϧρηι ϧεν παιϣαϥε.

Exodus 14:13 πεϫε μωυςης δε μπιμηϣ ϫε ϫεμνομϯ οϩι ερατεν θηνου ουοϩ αναυ επιουϫαι εθναϣωπι εβολ ϩιτεν `πϭοις φη ετεϥνααιϥ ναν `μφοου `μ`φρηϯ γαρ εταρετενναυ ενιρεμνχημι `μφοου `ννετενουαϩτεν θηνου ϫε εναυ ερωου ϣα `πςηου `ντε `πενεϩ.

Exodus 14:14 `πϭοις πε ετϯ εϩρηι εϫεν θηνου ουοϩ νθωτεν χαρωτεν.

Exodus 14:15 πεϫε `πϭοις δε μ μωυςης ϫε εθβεου κωϣ ε`πϣωι ϩαροι ςαϫι νεμ νενϣηρι `μπιςραηλ ουοϩ μαρουςεβτωτου.

Exodus 14:16 ουοϩ `νθοκ ϥαι μπεκϣβωτ ε`πϣωι ουοϩ ςουτεν τεκϫιϫ εβολ εϫεν `φιομ ουοϩ φορϫϥ ουοϩ μαρουι εϧουν `νϫε νενϣηρι `μπιςραηλ ϧεν θμηϯ `μ`φιομ επετϣουωου.

Exodus 14:17 ουοϩ ϩηππε ανοκ ϯναθρε πϩητ `μφαραω `νϣοτ νεμ νιρεμνχημι τηρου ουοϩ ειεενου εϧουν ϩιφαϩου `μμωου ουοϩ ειεϭιωου `ν`ϧρηι ϧεν φαραω νεμ `ν`ϧρηι ϧεν νεϥματοι τηρου νεμ `ν`ϧρηι ϧεν νεϥϩαρμα νεμ `ν`ϧρηι ϧεν νεϥϩθωρ.

Exodus 14:18 ουοϩ ευεεμι `νϫε νιρεμνχημι τηρου ϫε ανοκ πε `πϭοις αιϣανϭιωου `ν`ϧρηι ϧεν φαραω νεμ νεϥβερεϭωουτς νεμ νεϥϩθωρ.

Exodus 14:19 αϥουωτεβ δε `νϫε πιαγγελος `ντε `φνουϯ φη ετςωκ ϧαϫως νϯπαρεμβολη `ντε νενϣηρι `μπιςραηλ ουοϩ αϥμοϣι ϩιφαϩου `μμωου αϥουωτεβ δε ον `νϫε πικεςτυλλος `ντε ϯϭηπι εβολ ϧαϫωου ουοϩ αϥοϩι ερατϥ ϩιφαϩου `μμωου.

Exodus 14:20 ουοϩ αϥι εϧουν ουτε ϯπαρεμβολη `ντε νιρεμνχημι νεμ ουτε ϯπαρεμβολη `ντε πιςραηλ ουοϩ αϥϣωπι `νϫε ουγνοφος νεμ ουχακι ουοϩ αϥςινι `νϫε πιεϫωρϩ ουοϩ `μπουμουϫτ νεμ νουερηου `μπιεϫωρϩ τηρϥ.

Exodus 14:21 αϥςουτεν τεϥϫιϫ εβολ `νϫε μωυςης εϫεν `φιομ ουοϩ α `πϭοις ινι `μ`φιομ ϧεν ουθουρης `νϫονς `μπιεϫωρϩ τηρϥ ουοϩ αϥθρε `φιομ ϣωουι ουοϩ αϥφωρϫ `νϫε πιμωου.

Exodus 14:22 ουοϩ αυι εϧουν `νϫε νενϣηρι `μπιςραηλ εθμηϯ `μ`φιομ επετϣουωου ουοϩ ναρε πιμωου οι νουςοβτ ςαουιναμ νεμ ςαϫαϭη `μμωου.

Exodus 14:23 αυϭοϫι δε `νϫε νιρεμνχημι ουοϩ αυι εϧουν ϩιφαϩου `μμωου `νϫε νιϩθωρ τηρου `ντε φαραω νεμ νεϥϩαρμα νεμ νεϥϭαςι νϩθο εθμηϯ `μ`φιομ.

Exodus 14:24 αςϣωπι δε ϧεν ϯουερϣι `ντε ϩανατοουι αϥϫουϣτ `νϫε `πϭοις εϫεν ϯπαρεμβολη `ντε νιρεμνχημι ϧεν ουςτυλλος νχρωμ νεμ ουϭηπι ουοϩ αϥϣθορτερ νϯπαρεμβπλη `ντε νιρεμνχημι.

Exodus 14:25 ουοϩ αϥςωνϩ ννιαυξων `ντε νουβερεϭωουτς αϥενου εϧουν `νϫονς ουοϩ πεϫε νιρεμνχημι ϫε μαρενφωτ εβολ ϩα πϩο `μπιςραηλ `πϭοις γαρ πε ετϯ ε`ϧρηι εϫωου ουβε νιρεμνχημι.

Exodus 14:26 πεϫε `πϭοις δε μ μωυςης ϫε ςουτεν τεκϫιϫ εβολ εϫεν `φιομ ουοϩ μαρεϥι επεϥμα `νϫε πιμωου ουοϩ μαρεϥϩωβς εβολ εϫεν νιρεμνχημι νεμ εϫεν νιβερεϭωουτς νεμ εϫεν νιϭαςι `νϩθο.

Exodus 14:27 αϥςουτεν τεϥϫιϫ εβολ `νϫε μωυςης εϫεν `φιομ ουοϩ αϥι επεϥμα `νϫε πιμωου ϣα ουεϩοου νιρεμνχημι δε αυφωτ ϧαϫεν πιμωου ουοϩ α `πϭοις βορβερ ννιρεμνχημι εβολ εθμηϯ `μ`φιομ.

Exodus 14:28 ουοϩ αϥταςθο `νϫε πιμωου αϥϩωβς εβολ εϫεν νιβερεϭωουτς νεμ νιϭαςιϩθο νεμ εϫεν ϯϫομ τηρς `ντε φαραω νη εταυι εϧουν εφιομ ϩιφαϩου `μμωου ουοϩ `μπε ουαι ςωϫπ εβολ `ν`ϧητου.

Exodus 14:29 νενϣηρι δε `μπιςραηλ αυμοϣι ϩιτεν πετϣουωου ϧεν θμηϯ `μ`φιομ πιμωου δε ναϥοι νουςοβτ νωου ςαουιναμ νεμ ουςοβτ ςαϫαϭη.

Exodus 14:30 ουοϩ α `πϭοις νοϩεμ `μπιςραηλ ϧεν πιεϩοου ετεμμαυ εβολ ϧεν `τϫιϫ ννιρεμνχημι ουοϩ αϥναυ `νϫε πιςραηλ ενιρεμνχημι ευμωουτ εςκεν νενςφοτου `μ`φιομ.

Exodus 14:31 αϥναυ δε `νϫε πιςραηλ εϯϫιϫ εθναας νη εταϥαιτου `νϫε `πϭοις ννιρεμνχημι ουοϩ αϥερϩοϯ `νϫε πιλαος ϧατϩη `μ`πϭοις ουοϩ αυναϩϯ ε`φνουϯ νεμ μωυςης πεϥαλου.